ദമ്മാം: പ്രവാസലോകത്തെ കുടുംബങ്ങൾക്കിടയിൽ വിദ്യാഭ്യാസ, സാമൂഹിക, സാംസ്കാരിക രംഗങ്ങളിൽ സജീവവും ക്രിയാത്മകവുമായ ഇടപെടലുകൾ ലക്ഷ്യമിട്ട് കിഴക്കൻ പ്രവിശ്യ കെ.എം.സി.സി പ്രഥമ വനിതാ കമ്മിറ്റി രൂപീകരിച്ചു. പ്രവിശ്യക്ക് കീഴിലുള്ള ഒൻപത് സെൻട്രൽ കമ്മിറ്റികളിലെ വനിതാ വിങ്ങുകളിൽ നിന്ന് തിരഞ്ഞെടുത്ത 18 ഭാരവാഹികളടങ്ങുന്ന കമ്മിറ്റിയെ ദമ്മാം റോസ് ഗാർഡൻ ഓഡിറ്റോറിയത്തിൽ നടന്ന വനിതാ സംഗമത്തിൽ വെച്ച് ഈസ്റ്റേൺ പ്രവിശ്യ പ്രസിഡന്റ് മുഹമ്മദ് കുട്ടി കോടൂർ ഔദ്യോഗികമായി പ്രഖ്യാപിച്ചു.
പാർട്ടി നിയമാവലികൾ പാലിച്ച്, പുതിയ കാലത്തിന്റെ വെല്ലുവിളികളെ ഭൗതികവും ആത്മീയവുമായി നേരിടാൻ പുതിയ കമ്മിറ്റിക്ക് സാധിക്കട്ടെയെന്ന് അദ്ദേഹം ആശംസിച്ചു. കെ.എം.സി.സി നാഷണൽ കമ്മിറ്റി ചെയർമാൻ ഖാദർ ചെങ്കള സംഗമം ഉദ്ഘാടനം ചെയ്തു. ജീവകാരുണ്യ പ്രവർത്തനങ്ങൾക്കൊപ്പം ഉന്നതമായ സാംസ്കാരിക മൂല്യങ്ങൾ ഉയർത്തിപ്പിടിക്കാനും കുടുംബങ്ങളെ ചേർത്തുനിർത്താനും വനിതാ വിങ് മുന്നോട്ടുവരണമെന്ന് അദ്ദേഹം ഓർമ്മിപ്പിച്ചു.
ഷബ്ന നജീബ് (പ്രസിഡന്റ്), റുഖിയ റഹ്മാൻ (ജനറൽ സെക്രട്ടറി), സുമയ്യ ഫസൽ (ഓർഗനൈസിംഗ് സെക്രട്ടറി), നാജിറ ശംസുദ്ധീൻ (ട്രഷറർ) എന്നിവരാണ് പ്രധാന ഭാരവാഹികൾ. സാഫ്രോൺ മുജീബ്, സാജിത നഹ, ഹാജറ സലീം, ഫൗസിയ റഷീദ്, സുലൈഖ ഹുസൈൻ, ഷാനിബ ഉമ്മർ, സുമയ്യ ബീവി എന്നിവരെ വൈസ് പ്രസിഡന്റുമാരായും ഫസ്ന മഹ്മൂദ്, നെജിമോൾ, ഫസീന ഇഖ്ബാൽ, സമീഹ സമദ്, സീനത്ത് അഷ്റഫ്, സൽമ അഫ്സൽ, നജ്ല അസ്ഹർ എന്നിവരെ സെക്രട്ടറിമാരായും തിരഞ്ഞെടുത്തു.
ചടങ്ങിൽ നാഷണൽ കമ്മിറ്റി സെക്രട്ടറി ആലിക്കുട്ടി ഒളവട്ടൂർ, സാംസ്കാരിക സമിതി ചെയർമാൻ മാലിക് മഖ്ബൂൽ ആലുങ്ങൽ, വെൽഫെയർ വിംഗ് ചെയർമാൻ ഷാജി ആലപ്പുഴ എന്നിവർ ആശംസകൾ നേർന്നു. പ്രവർത്തന മണ്ഡലത്തിലെ പ്രായോഗിക രീതികളെ കുറിച്ച് ഷാഫി മാസ്റ്ററും, വനിതാ കമ്മിറ്റിയുടെ പ്രവർത്തന രൂപരേഖ പ്രവിശ്യ വൈസ് പ്രസിഡന്റ് അബ്ദുൽ മജീദ് കൊടുവള്ളിയും അവതരിപ്പിച്ചു.
തുടർന്ന് നടന്ന വനിതാ സമ്മേളനത്തിൽ പ്രവിശ്യ വർക്കിംഗ് പ്രസിഡന്റ് ഖാദർ മാസ്റ്റർ വാണിയമ്പലം, അമീർ അലി കൊയിലാണ്ടി, സെൻട്രൽ-ജില്ലാ കമ്മിറ്റി നേതാക്കളായ സൈനു കുമളി, ഇഖ്ബാൽ ആനമങ്ങാട്, ഉമ്മർ ഓമശേരി, കെ.പി ഹുസൈൻ വേങ്ങര, നജീബ് ചീക്കിലോട്, മുഹമ്മദ് കുട്ടി കരിങ്കപ്പാറ, വനിതാ നേതാക്കളായ ഷബ്ന നജീബ്, സുമയ്യ ഫസൽ, നാജിറ ശംസുദ്ധീൻ എന്നിവർ സംസാരിച്ചു. പ്രവിശ്യ കമ്മിറ്റി ആക്റ്റിംഗ് ജനറൽ സെക്രട്ടറി കെ.പി അബ്ദുസ്സമദ് സ്വാഗതവും ട്രഷറർ അഷ്റഫ് ഗസ്സാലി നന്ദിയും പറഞ്ഞു.
