മലപ്പുറം- ഈ നിയമസഭ തെരഞ്ഞെടുപ്പിൽ തോൽവി സമ്മതിച്ച് ആദ്യമായി രംഗത്തെത്തിയിരിക്കുകയാണ് മുൻ മന്ത്രിയും ഇടതുസഹയാത്രികനുമായ ഡോ. കെ.ടി ജലീൽ. തവനൂരിൽ കോൺഗ്രസ് നേതാവും മലപ്പുറം ജില്ലാ കോൺഗ്രസ് പ്രസിഡന്റുമായ വി.എസ് ജോയിയോട് തോൽവി സമ്മതിച്ചാണ് ജലീൽ ഫെയ്സ്ബുക്കിൽ കുറിപ്പിട്ടത്. രണ്ടു പതിറ്റാണ്ടോളമായി ബാലിശമായ ആരോപണങ്ങൾ ഉന്നയിച്ചിരുന്ന ജലീൽ പൂർണ്ണ പരാജയം സമ്മതിച്ചതാണ് ഏതാനും നിമിഷം മുമ്പ് ഫെയ്സ്ബുക്കിൽ കുറിപ്പിട്ടത്. കുറ്റിപ്പുറത്തും തവനൂരിലും തുടർച്ചയായ വിജയം നേടിയ ജലീൽ ഒടുക്കം പരാജയത്തിന്റെ രുചി കൂടി അറിഞ്ഞിരിക്കുന്നു.
വി.എസ് ജോയിയുടെ വിജയം യഥാർത്ഥത്തിൽ ഒരു കേരള സ്റ്റോറി കൂടിയാണ്. തവനൂർ മണ്ഡലത്തിൽ ക്രിസ്ത്യൻ വിഭാഗത്തിലെ ഏകദേശം 2000 പേർ മാത്രമാണുള്ളത്. ആ മണ്ഡലത്തിലാണ് യു.ഡി.എഫ് സ്ഥാനാർത്ഥിയായി വി.എസ് ജോയിയെ അവതരിപ്പിച്ചത്. ജോയിയുടെ വിജയത്തിൽ കുറഞ്ഞ ഒന്നുകൊണ്ടും ലീഗിന് തൃപ്തിയാകുമായിരുന്നില്ല. സ്ഥാനാർത്ഥിത്വം പ്രഖ്യാപിച്ച അന്നു മുതൽ ഇന്ന് വിജയ സോപാനത്തിലേക്ക് കയറുന്നത് വരെ ലീഗ് വിശ്രമമില്ലാതെ പ്രവർത്തിച്ചു. തവനൂരിലെ വിജയം മുസ്ലിം ലീഗിന് നൽകുന്ന ആവേശം തീരെ ചെറുതല്ല.
