മനാമ – 2025 സെപ്റ്റംബർ ഒന്നുമുതൽ ബഹ്റൈനിലേക്ക് യാത്ര ചെയ്യുന്നവർക്ക് ‘ഓകെ ടു ബോർഡ്’ സന്ദേശം ആവശ്യമില്ലെന്ന് എയർ ഇന്ത്യ. ബഹ്റൈനിലേക്കുള്ള വിസയുടെ വിവരങ്ങൾ യാത്രക്കാർക്ക് ഇനി ഓൺലൈനായി പരിശോധിക്കാവുന്നതാണ്.
സന്ദർശക വിസകളും ഫാമിലി വിസകളും ഇ-വിസ വെബ്സൈറ്റിലൂടെയും തൊഴിൽ വിസയും കുടുംബ വിസയും എൽ.എം.ആർ.എയുടെ വെബ്സൈറ്റിലൂടെയും പരിശോധിക്കാം. വീട്ടുജോലിക്കാർക്കുള്ള വർക്ക് പെർമിറ്റ് എൽ.എം.ആർ.എ വെബ്സൈറ്റിൽ ലഭ്യമാണ്.
നേരത്തെ വിസയുടെ കോപ്പി അതത് എയർലൈൻ ഓഫീസിൽ ചെന്ന് പരിശോധനക്ക് വിധേയമാക്കാറായിരുന്നു. അതിനായി മൂന്ന് ദിനാർ വരെ ചാർജും ഈടാക്കിയിരുന്നു. ഇനിമുതൽ അതിൻ്റെ ആവശ്യം ഇല്ല എന്നതാണ്. യാത്രക്കാർ വിസയുടെ പ്രിന്റൗട്ട് കൈവശം വെച്ചിട്ടുണ്ടെന്ന് ഉറപ്പാക്കണമെന്ന് എയർ ഇന്ത്യ അറിയിപ്പിൽ പറയുന്നു.
